Please enable JS

Ngā Kaupapa Raumati hou o ngā kaiwhiwhi Karahipi Māori mō Te Hau Kāinga

xmas morning

Tino kawa rawa tō mātou ngākau i ngā tauira ka mahi i ā rātou kaupapa rangahau ā te raumati nei mō Te Hau Kāinga.  I tērā tau, tokotoru ngā tauira rawe.  Kōwhiritia ō rātou ingoa kia kitea ā rātou mahi: Dylan Thomas; Connor Aston; Jordan Quinnell 1, &2].  Waimarie rawa atu mātou, ka taea e mātou ngā tauira tokoono te tautoko i tē raumati nei.  He mihi nui hoki ki te Kete Aronui o te Whare Wānanga o Ōtākou mō tā rātou pūtea hei āwhina i tētahi tokorua.  Nā, ko wai mā ēnei kaiwhiwhi karahipi?

 

He Taonga Tuku Iho: Te mahi tonutanga o ngā waiata o te pakanga i ēnei rā.

He tauira a Bethany Waugh (Te Āti Awa) nō te Whare Wānanga o Ōtākou.  Kua oti i a ia tana tohu paetahi i te tau 2020, ko te wetereo me te mātauranga tikanga tangata ngā tino kaupapa, ko te mātauranga puoro ā-iwi te kaupapa tuarua. Ā te tau 2021 te tohu hōnore (mātauranga tikanga tangata) tīmataria ai.  Ko tōna tino pīrangi he whakamau, he whakaora i ngā reo, i ngā tikanga, i ngā mahi puoro o ngā iwi taketake, inarā i tō rātou mahi tahi ko ngā iwi ake o te Moana Nui a Kiwa me Āhia ki te Tonga, kia whakanuitia ēnei taonga tuku iho e aua iwi.

Mō te rangahau raumati nei, ka aro atu a Bethany ki ngā waiata Māori i titoa i te wā pakanga, i tukuna mai hei taonga mō nāianei. Ka kōrero a Bethany ki ngā kapa e whakamahi ana i aua waiata i ēnei rā, kia mōhiotia he aha ō rātou whakaaro mō aua taonga me ō rātou hononga ki ngā kaitito, he aha e waiatatia tonutia ai, ā, te take e whakahirahira nei kia rangona tonutia aua waiata.  Ko Angela Wanhalla tōna kaitautoko tuatahi, ko Lachy Paterson te tuarua.

 

Ngā mahi pirihimana ki Te Whāiti, me ngā mahi pāmu ki Kuhawaea.

Nō te Whare Wānanga o Waikato a  Rebecca Lee Ammunson (Raukawa ki Wharepūhunga, Te Whakatōhea, Ngāti Whakaue ki Hurungaterangi, Ngāti Whitikaupeka, Ngā Puhi me Ngāti Pākehā nō Nōwei, Ingarani, me Kōtirana). Kua poto tana tohu paetahi, ko te hītori me te reo Ingarihi ngā kaupapa nui, me te “Tohu Paetahi”, arā, i te tohu reo Māori kaha o Waikato.  Ka tahuri ia ki te tohu hōnore (hītori) ā tērā tau, me tea ko tonu i te reo rangatira, ake ake ake.  Tino kaikaha rawa a Rebecca ki te āwhina i ngā mahi whakatangatawhenua i Aotearoa, i te whakawhanaungatanga hoki o Ngāi Māori me te iwi Pākehā, ā, ki te hono atu ki te whānau me te whenua.

Ko te whāinga o tāna rangahau raumati he whakaputa i tētahi pūrongo e whakatōmenea ai ngā wheako o ngā whānau e rua i Aotearoa, mai i te tekautau 1930, mā te Pakanga Tuarua me te tekautau 1950, tae atu ki nāianei.  Mā tēnei rangahau ka timata te kite i ngā koiora o ngā tāngata, he whakapapa Māori, Pākehā hoki ō rātou, e noho ana ki ngā wāhi taiwhenua i tua atu i ō rātou ake takiwā ā-iwi. Ka uiuia he hoa nō tōna whānau; i te wā pakanga he taitamaiti ia i roto i te kura o Te Whāiti; ka mahi ai ki ngā pāmu Pākehā o Kuhawaea (Galatia).  Ko tōna pāpā te pirihimana i Te Whāiti.  I riro hoki he pāmu i te tīpuna Pākehā o Rebecca ki Kuhawaea i muri i te Pākanga Tuatahi. Nā reira, ka kōrero ia ki tōna kuia mō ngā mahi o taua whānau i taua wā.  Ka whakamahi hoki a Rebecca i ngā rauemi ā-pukapuka hei whakakaha i tāna rangahau. Ko Angela Wanhalla te kaitautoko tuatahi, ko Lachy Paterson te tuarua.

  

Ngā Wheako o te Taitokerau i muri i te Pakanga.

 Kei te ako a Leighton Williams (Ngāti Hine, Ngāpuhi, Ngāti Whanaunga, Ngāti Āpia (Kuki Airani)) i te mātauranga Māori me te reo rangatira, i te ture hoki, ki te Whare Wānanga o Ōtākou, ā, ka whaia tonutia ēnei kaupapa ā tērā tau.

 Ā te raumati nei, ka titiro tā Leighton kaupapa rangahau ki ngā wheako o ngā whānau Māori o ngā takiwā taiwhenua o Te Taitokerau, me te whakapā mai o ngā mahi kāwanatanga i ngā tau i muri tata mai i te pakanga.  Inarā, ka tuhi ia mō te koiora o tōna kuia, me ōna wheako ki Pipiwai, āpā noa ki tōna hekenga ki te tāone i te tekautau 1960.   Ko Erica Newman te kaitautoko tuatahi, ko Lachy Paterson te tuarua.

 

Ngā kawekawe o te Pakanga Tuarua ki Wharekāhika, i te Tai Rāwhiti.

 “Hei runga nei au o Pātangata, ka pae atu te titiro i Te Nukuroa nei, nā Te Ihorangi ka puta ko Aunui, heke mai ki a au. Ko Valerie Houkamau tōku ingoa. Ka heke mai au i Ngāti Porou, Ngāti Manawa, Ngāti Ranginui, Ngāti Raukawa, Te Ātiawa whānui hoki. Ka hono ngā kāwai whakapapa, ka puta ko au. Tēnei tētahi o ngā mokopuna o Tūwhakairiora ka mihi.”

 He tauira a Valerie Houkamau nō Te Tumu, o Te Whare Wānanga o Ōtākou, ko te mātauranga Māori me te reo rangatira te tino kaupapa o tana tohu paetahi.  Ko tāna kaupapa kōrero e hāngai ana ki ngā tūmomo whakaaweawe i whakapā atu ki tōna hapū nō roto mai i te riu o Ngāti Porou i te hinganga o te pakanga tuarua o te ao. Ko tōna hiahia kia rangahautia, kia kōrerotia, kia whakarongotia ngā kōrero tawhito o mua nō roto mai i tōna haukāenga o Wharekāhika.  Ko Lachy Paterson te kaitautoko tuatahi, ko Angela Wanhalla te tuarua.

 

Te whiwhinga i te papakāinga mō ngā mahi pakanga.

 He tauira a Talia Ellison (Kāi Tahu, Te Āti Awa, Ngāti Toarangatira) nō te Whare Wānanga o Ōtākou e whakaoti ana i tana tohu paerua (Master of Peace and Conflict Studies).

 Tino harikoa rawa atu a Talia ki te uru ki roto i te kaupapa o te Hau Kāinga hei whakahōnore i ōna tūpuna o Ngāti Puketapu, hei totoro atu hoki ki tōna whānau i Paraparaumu.   I te tau 1939 ka tangohia te whenua o te hapū hei hanga i tētahi papa rererangi. Engari, ka mutu te pakanga, kīhai i whakahokia, ka tū tonu hei papa rererangi arumoni.  Ko te whāinga o te kaupapa he kōrero ki ngā kaumātua me ngā pakeke hei rangahau i te hītori me te takotoranga o te whenua o te rohe nei.  Ā muri, ka tito ia i tētahi oriori, hei momo waka mō ēnei mātauranga whakahirahira, hei whakakaha i te tuakiri o te hapū.  Ko Lachy Paterson te kaitautoko tuatahi, ko Angela Wanhalla te tuarua.

 

Ngā ākonga Māori o ngā kāreti nunui i te wā pakanga.

Ko Ōtepoti te tāone i whānau mai ai a Zoe Thomas (Raukawa), ā, ko tōna kāinga tupu hoki.  Kātahi ia ka whakaoti i tana tau tuarua ki te Whare Wānanga o Ōtākou, e whai ana i te kaupapa hītori me te Indigenous Development/He Kura Matanui, ā, ka haere tonu ēnei mahi āna ā tērā tau.

Ko te kaupapa o tā Zoe mahi rangahau ko ngā ākonga Māori e ako ana ki ngā kāreti nunui, ki ngā whare wānanga i te wā o te Pakanga Tuarua.  Ka taea pea e ia te whakarite ngā wheako o ngā ākonga i uru ki roto i ngā momo whare, hei tauira i ngā kāreti kuramāhita me te kura tākuta i Ōtākou.  Ka toro atu pea te rangahau nei ki te titiro i pēheatia te kuranga o aua ākonga e te pakanga, ā, i pēhea ngā mahi a ētahi o rātou i muri i te whawhai.

 

Whakaahua: "Christmas Morning at Te Whaiti. (1944) Five boys (and dog) from the Maori Boys Farm, on Christmas Day with their presents (boots?? stockings?). Including - (Left to Right) :---; Charlie ; Kiri ; Sam ; Kori.", Nama: A-S8-39.64-127, kei te Presbyterian Research Centre.

Whakapā Mai