Ngā Pūrongo a Ā Mātou Ākonga Ā-Raumati (2020-21)
Ko tētahi mea pai rawa atu, ko tētahi mea whai-hua, o te kaupapa Te Hau Kāinga ngā ākonga i whiwhi ki ngā karahipi ā-raumati. I kimihia e ēnei rangatahi Māori ā rātou ake kaupapa rangahau, i puta mai nei ngā ariā hou kore rawa i whakaarohia e mātou. Āpiti atu ki te pūtea o te Otago Māori Students’ Summer Bursaries, tokoono ngā ākonga karahipi ka taea e mātou te tautoko i te raumati 2020/21 nei.
Bethany Waugh, A Legacy of Song: Contemporary Performance of World War Two Waiata. https://indd.adobe.com/view/47949c76-4dff-4c19-9949-bba659f21fa6
Mahia ai, waiatatia ai i ēnei rā ētahi o ngā waiata i titoa i te wā pakanga. I kōrero a Bethany Waugh (Te Āti Awa) ki ngā kaiako ā-kapa-haka tokotoru e pupuri tonu ana i ēnei waiata, me te matapaki i ngā waiata, ā, he pēwhea ngā pānga ki ngā iwi Māori o ēnei rā.
Nā Angela Wanhalla tēnei pūrongo i whakahaere. Kei te whai a Bethany i te tohu hōnore (Anthropology) ki te Whare Wānanga o Ōtākou.
Talia Ellison, He Oriori mō Puketapu ki Te Wai o Rongomai. https://indd.adobe.com/view/b428a67d-42ad-471d-b298-f3979b3c8a95
Nō te tau 1939, ka tangohia te whenua Māori i Paraparaumu ki te hanga i te papa waka-rererangi; i muri i te pakanga, ka tukuna te whenua hei Kapiti Airport. Nā te raupatu nei i memeha ai ngā hononga o Puketapu ki tō rātou whenua; ko te hapū rātou o taua wāhi, nō Te Āti Awa. Mō tāna kaupapa rangahau, ka tahuri a Talia Ellison (Te Āti Awa, Kāi Tahu) ki te tito i tētahi oriori hei takoha e tīmata ai pea te oranga o te hapū, engari i a ia e rangahau ana, ka puta kē te whakaaro, ā, ka titoa kētia he rotarota. He whakamāramatanga o taua rotarota kei roto i tāna pūrongo, me te tūmanako ka whakawhanaketia taua waiata e tōna hapū.
He mea whakahaere te pūrongo nei e Lachy Paterson. Kei te whakaoti a Talia i te tohu Master of Peace and Conflict Studies ki te Whare Wānanga o Ōtākou.
Leighton Williams, He Matapihi ki tōna Ao. https://indd.adobe.com/view/164b3839-b671-4529-b7f8-50942a33ebcf
I ngā wā o mua, he wāhi toritori a Pipiwai (he kāinga tēnei kei Te Taitokerau), engari, ka heke te nuinga o ngā tāngata ki te tāone i muri i te pakanga. Kei te torohē a Leighton Williams (Ngāti Hine, Ngāpuhi, Ngāti Whanaunga, Ngāti Āpia (Kuki Airani)) i ngā mahi a te kāwanatanga i aranga ai te hekenga nei, me ngā pānga ki Pipiwai, mā tāna titiro ki te koiora o tōna kuia.
Nā Erica Newman te pūrongo nei i whakahaere. Kei te ako a Leighton i te reo Māori me ōna tikanga ki te Whare Wānanga o Ōtākou.
Valerie Houkamau, He Wiwi, He Nāti, He Whanoke. https://indd.adobe.com/view/0efe3358-8e76-4924-9fc5-4c335b817391
Nō te raumati kua hipa mai nei, ka hoki a Valerie Houkamau (Ngāti Porou, Ngāti Manawa, Ngāti Raukawa, Ngāti Ranginui, Te Ātiawa) ki tōna wā kāinga i Wharekāhika (Hicks Bay) e whakahaere nei ōna mātua i te whare hokohoko. Kei te whakatewhatewha tāna pūrongo i ngā pānga o te pakanga ki taua kāinga, i ngā pikinga me ngā hekenga, i te mahi tahi hoki o ngā tāngata i taua wā o te mate me te kohuki.
He mea whakahaere te pūrongo nei e Lachy Paterson. Kei te ako a Val i te reo Māori me ōna tikanga, i te ture hoki, ki te Whare Wānanga o Ōtākou.
Zoe Thomas (Raukawa), Māori, World War Two and University: The Student Experience. https://indd.adobe.com/view/f17fec52-6916-4fac-8def-1c6b145563b4
Ahakoa he maha ngā rangahau e pā ana ki ngā kura Māori o mua, he iti ngā mea mō ngā whēako Māori i roto i ngā whare wānanga i te wā o te Pakanga Tuarua, i ngā tau e whai ana rānei. Kei tāna pūrongo, kei te titiro a Zoe Thomas (Raukawa) ki ngā ākonga tokotoru, ki Jacqueline Sturm rātou ko Maharaia Winiata ko Leonard Broughton, me ō rātou tau ki ngā whare wānanga, me ā rātou mahi o muri.
I whakahaeretia te pūrongo nei e Miranda Johnson. Kei te Whare Wānanga o Ōtākou a Zoe, e ako ana i te Hitōria me te Indigenous Development.
Rebecca Lee Ammunson, A Māori Policeman’s Son through WWII: Charlie ‘Half-Jack’ Bidois, Mai Te Whāiti ki te Ao. https://indd.adobe.com/view/1a05633f-4981-4340-bac0-89252299d189
Nō Ngāti Whakaue ki Hurungaterangi, nō Raukawa, nō Te Whakatōhea, nō Ngāti Whitikaupeka, nō Ngā Puhi me Ngāti Pākehā a Rebecca Lee Ammunson. I kōrero ia ki tētahi hoa nō te whānau, ki a Charlie Bidois (Ngāti Whakaue) mō tōna koiora, arā, tōna tipu ki Te Whaiti i te Urewera i whakanohoia ai tōna pāpā hei pirihimana, mō tōna kuranga me tāna mahi hei hēpara i te wā o te Pakanga Tuarua. I muri i te pakanga, ka wehe atu a Charlie kia kite i te ao. He hōia ia nō te Tauā o Piritene, ā, i tōna hokinga mai ki Aotearoa ka mahi ia ki Murihiku, ka rītaia ai ia ki Rotorua. I kawea a Charlie e Rebecca rāua ko tōna māmā ki Te Whāiti me Galatea toro ai i ngā wāhi o tōna tamarikitanga, kia puta mai anō ōna mahara o taua wā.
He mea whakahaere te pūrongo nei e Angela Wanhalla. He ākonga a Rebecca nō te Whare Wānanga o Waikato i ako ai ia i te Hitōria, i te reo Pākekā, me te reo Māori.
Image: Ngā rōpū rangahau o te Kura Tuatahi o Maunganui, ko Montgomery me Upham ngā ingoa. Nō te pae tuatoru pea, i te tau 1943, 1944 rānei. Nama: 13-721. Tauranga City Library.